Allir elska JKÁ
- heimasíða Jóns Knúts Ásmundssonar.
Athugasemdir
Eldri skrif
Stjornbord
Dundaði mér við að lesa málefnasamning D og B í kaffipásunni áðan. Lagðist nú svosem ekki í neinn djúplestur en mér sýnist þetta vera ósköp sakleysislegt. Að venju eru mál sett á oddinn sem allir geta verið sammála um. Maður situr eiginlega bara uppi með spurninguna til hvers var verið að kjósa? Hver er á móti því að auglýsa eftir bæjarstjóra eða að koma skuli veg fyrir biðlista í leikskólum?
Það eina sem ég velti fyrir mér er þetta með sameiningu Austurlands. Nú var það svo að eini maðurinn sem var að velta þessu fyrir sér var oddviti sjálfstæðismanna en síðustu dagana fyrir kosningar varð þetta mál það mikilvægasta sem nokkurn tímann hafði verið kosið um í sögu austfirsks sveitarfélags. Þessu fylgdi svo afar prófessjónal hræðsluáróður um að það væri blautur draumur Fjarðalistans að sameina Austurland í eitt sovét.
Þetta var svo mikið rugl að það nennti enginn að rífast um þetta við oddvitann. Engu að síður var þetta málið sem átti að aðgreina X-D (dásamlega róbótískt nafn á Sjálfstæðisflokkinn) frá hinum. Það sögðu þeir að minnsta kosti sjálfir og ég held hreinlega að það hafi verið til fólk sem trúði þessu. En hvað um það. Auðvitað er búið að draga í land með þetta og opinbera skýringin eflaust sú að Framsóknarflokkurinn hafi sett það sem skilyrði fyrir frekari meirihlutaviðræðum. Jájá. Þabbarasona. Ef pólitískur ágreiningur í Fjarðabyggð snýst um nefndasetu í einhverri SSA-nefnd held ég að við getum bara lagt niður lýðræðið. Fengið Jón Gnarr til að stjórna þessu eða eitthvað.
Auðvitað er skýringin sú að þetta var ekkert annað en lýðskrum. Það stóð aldrei til að beita sér af einhverri hörku í þessu máli. Þetta var einfalt reikningsdæmi: Ölum á Hérahatri og einhverjir eru örugglega nógu vitlausir til að kjósa okkur.
Elsta trixið í bókinni.
…
Las líka pistilinn eftir Jóhann Hauksson um RÚV. Hann er ágætur en ég veit nú ekki hvort RÚV sé eitthvað áberandi undirgefið valdinu. Hélt nú reyndar ekki satt að segja. En ég er sammála þessu með landsbyggðarstöðvarnar. Hef skrifað um dauða RÚVAust áður en ég hef bara svo mikinn áhuga á fjölmiðlun á Austurlandi að ég finn mig knúinn til að skrifa örlítið meira.
Ég heyrði nefnilega haft eftir bæjarfulltrúa á Egilsstöðum, hvers nafn fékkst ekki uppgefið, að það væri hið besta mál að RÚVAust væri svo gott sem hætt að flytja fréttir. Þær voru nefnilega alltaf svo neikvæðar og þá er eiginlega bara betra að vera laus við þær. Svo var haft eftir þessum sama bæjarfulltrúa að Gísli Einars væri dæmi um mann sem kæmist alltaf að með jákvæðar fréttir af Vesturlandi. Þetta var meint sem hrós.
…
Með ekkert svo óskaplega mikilli einföldun má segja að umræða á landsbyggðinni um fréttir snúist nær einvörðungu um hinn svokallaða “jákvætt-neikvætt kvarða”. Spurt er:
Hversu góð (eða vond) er fréttin fyrir ímynd samfélagins?
Næstvinsælasta umræðuefnið er kvótaskipting frétta eftir byggðalögum.
Á þeim liðlega þremur árum sem ég starfaði við fréttamennsku á Austfjörðum átti ég aldrei samtal við bæjarfulltrúa eða bæjarstjóra (eða stýru) um sannleiksgildi frétta. Allir gátu t.d. verið sammála um að tiltekin frétt væri dagsönn en það brást ekki að ef hún var gagnrýnin þá “varpaði hún neikvæðu ljósi á samfélagið.”
(“Og þá tapa allir. Ekki satt, Jón minn?”)
Þessi krafa kemur auðvitað ekki bara frá bæjarfulltrúum. Þetta er hið almenna viðhorf til fjölmiðlunar og fréttamennsku á Austfjörðum. Fólki finnst raunverulegar fréttir óþægilegar. Þannig er það bara.
Í svona andrúmi kafnar metnaður og hugsun og þetta er mjög líklega helsta ástæðan fyrir dauða RÚVAust. Fjölmiðlar verða nefnilega aldrei betri en samfélagið sem þeir spretta úr og þar af leiðandi verðskulda Austfirðingar þessa aumustu tíma í fjölmiðlasögu fjórðungsins. Þetta vildu þeir. Þetta fengu þeir.
4 athugasemdir
Skrifa athugasemd
Gunnar Geirsson 22June2010
…. og Bændablaðið eina blaðið sem Austfirðingar geta nálgast ókeypis nú um stundir.
Jón Knútur 22June2010
…ekki gleyma Dagskránni.
Hafdís 22June2010
Já Jón minn, góður punktur. Nú fréttamenn Rúv-aust sannarlega unnu vel og við sem þar vorum. Og þegar það gerðist að leggja átti stöðina niður, þá var eins og öllum stæði á sama, amk flestum. Enginn veit hvað átt hefur fyrr en misst hefur og sannarlega voru stundum neikvæðar fréttir, auðvitað sannar fréttir. En mjög oft voru líka “jákvæðar og skemmtilegar fréttir”, held að fólk hafi bara ekki tekið eins mikið eftir þeim eða hvað? Nei, mér fannst engin barátta hér eystra þegar ákveðið var að loka! Og ég veit að fólk gerði sér ekki grein fyrir því mikla starfi sem fréttamenn unnu! Við sannarlega söknum þess að það hafi verið klippt á þetta. Og ég fer ekki ofan af því að mér finnst okkur vera mismunað, hef ekki látið mér detta í hug að kaupa Fréttablaðið eftir að fara átti að selja okkur það. Ég skal líka viðurkenna að mér fannst þetta auðvitað Páli og Óðni að kenna að Svæðisútvarpið var lagt niður, bara þeirra duttlungar ekki vegna þess að við værum svo dýr í rekstri!
Hilmar 23June2010
Góður pistill hjá þér. Ekki veit hvort þú hafir séð þetta Jón, en þetta eru fáeinar hugleiðingar sem ég fest á blað um íslensk stjórnmál í kringum kosningarnar 1995. Bjó til flokk sem heitir Framfaraflokkurinn. Þó liðinn sé einn og hálfur áratugur frá því að ég skrifaði þetta, á inntakið enn við í dag, finnst mér.
I
„Vitaskuld er ég ánægður með útkomuna. Þessi listi okkar er geysisigurstranglegur. Við höfum geysisterka málefnastöðu og við munum leggja allt í púkkið til þess að sigra. Nú er lag.“ sagði Gunnsteinn Unnsteinsson formaður kjördæmisráðs Framfaraflokksins í Suður¬landskjördæmi syðra í samtali við blaðamann Héraðsfréttatíðinda í gær. Listi Framfara¬flokksins er þannig skipaður.
1. sæti, Jón Jónsson, bóndi á Minnanúpi
2. sæti, Guðrún Jónsdóttir, húsfreyja á Minnanúpi
3. sæti, Guðmundur Jónsson, vinnumaður á Minnanúpi
4. sæti, Dr. Jón Guðmundsson, stjórnlagaheimspekingur á Minnanúpi.
Þegar Gunnsteinn var spurður um þau málefni sem flokkurinn hyggst leggja áherslu á í komandi kosningabaráttu svaraði hann, „Við erum með fjölþættan málefnapakka. Eins og við höfum áður sagt, vill Framfaraflokkurinn stuðla að nýsköpun í atvinnulífinu. Við viljum til dæmis fullvinna allar fiskafurðir í landinu og jafnframt viljum við kanna til hlítar þá möguleika sem skapast með auknu ferðamannaiðnaði. Við erum nefnilega að sigla inn í 21. öldina, það er alveg ljóst. Einnig vill Framfaraflokkurinn innleiða mildandi kjarajöfnunaraðgerðir og hækka lægstu launin í þjóðfélaginu. Skatta- og vaxtamál þurfa að taka föstum tökum. Hér eru mörg verk að vinna og við munum snúa bökum saman og láta hendur standa fram úr ermum.“
II
Sveinn Sv. Sveinsson frambjóðandi Framfaraflokksins í Norðurlandskjördæmi neðra hafnaði í fimmta sæti í almennu lokuðu prófkjöri sem haldið var um síðustu helgi. Tólf manns greiddu atkvæði, en alls höfðu um 340 flokksmenn rétt til þátttöku. „Ég vil fyrst og fremst þakka fjölskyldu minni og öllu því góða fólki er studdu mig. Ber er hver að baki, nema sér bróður eigi. Þetta var geysihörð barátta en drengileg,“ sagði Sveinn við blaðamann Héraðsfréttatíðinda eftir að lokatölur voru birtar. Aðspurður sagði Sveinn hvorki hyggja á sérframboð enda lítur hann svo á að fimmta sætið sé baráttusæti flokksins í kjördæminu. Í síðustu kosningum fékk Framfaraflokkurinn þrjá menn kjörna. Þegar Sveinn var spurður að hvaða málaflokki hann kæmi til með að leggja höfuð áherslu á ef hann næði kjöri svaraði hann, „Atvinnumál eru mér afar hugleikin“.
III
„Eins og forsætisráðherra Breta sagði eitt sinn, þá er vika ákaflega langur tími í pólitík. Ákaflega langur tími. Staðan, eins og hún er í dag, er galopin. Galopin. Það getur bókstaflega allt gerst,“ sagði Hróbjartur Hrólfsson í samtali við blaðamann Héraðsfréttatíðinda þegar úrslitin lágu fyrir í prófkjöri Framfaraflokksins í Vesturlandskjördæmi ytra. Hróbjartur sem er þingmaður kjördæmisins hafnaði í fjórða sæti en hann stefndi á það fyrsta. „Já, ég get sagt það hér og nú, það er aldeilis óvíst hvort ég taki fjórða sætið. Ég er í pólitík til þess að hafa áhrif, ekki bara til þess að taka þátt og vera með.” Hróbjartur segist hafa fengið margar áskoranir frá fólki hvaðanæva að í kjördæminu og frá öllum flokkum, í þá veru að hann fari í sérframboð. Er Hróbjartur var inntur eftir því hvað hann hyggst gera sagði hann, „Nú ætla ég að leggjast undir feld og íhuga málið.”
IV
Á kjördæmisráðsfundi Framfaraflokksins í Austurlandskjördæmi var samþykkt eftirfarandi stjórnmálaályktun:
„Framfaraflokkurinn er alíslenskur stjórnmálaflokkur sem er sprottinn úr íslenskum jarðvegi og er reiðubúinn að glíma við íslenskan veruleika. Framfaraflokkurinn er framfarasinnaður umbótaflokkur sem hafnar öllum öfgum til hægri og vinstri. Framfaraflokkurinn vill innleiða ný vinnubrögð í íslensk stjórnmál. Spilling og fyrirgreiðslupólitík hefur alltof lengi verið einkennandi fyrir stjórnmálalíf hér á landi. Þessu vill flokkurinn breyta. Framfaraflokkurinn vill taka upp heiðarleg og trúverðug vinnubrögð í pólitík. Framfaraflokkurinn vill opið stjórnmála- og embættismannakerfi sem tryggir jafnrétti og réttlæti. Framfaraflokkurinn við uppstokkun í íslenska flokkakerfinu. Ferskir vindar framtíðarinnar verða að blása um sali Alþingis.”
V
„Ég er að sjálfsögðu ánægð. Ekki bara fyrir mína hönd, heldur fyrir hönd allra þeirra sem studdu mig í þessari erfiða baráttu. Í raun er ég ánægð fyrir hönd þjóðarinnar,” sagði Embla Eir Eyrúnardóttir í samtali við blaðamann Héraðsfréttatíðinda, stuttu eftir að yfirkjörstjórnin tilkynnti að hún hafði sigrað í prófkjöri Framfaraflokksins í Vesturlandskjördæmi eystra. Alls fékk Embla Eir 31 atkvæði í fyrsta og annað sætið. Hreinn Sveinsson frá Flannastöðum hafnaði í öðru sæti með 12 atkvæði í tvö efstu sætin. „Nú er bara spurning um að slíðra sverðin, safna liði, snúa bökum saman, láta hendur standa fram úr ermum og láta verkin tala,” svaraði Embla Eir þegar hún var innt eftir því hvað tæki við.
VI
„Þessi niðurstaða kemur mér ekkert á óvart. Ég veit alveg hvernig Embla Eir og hennar meðreiðarsveinar komu að þessu máli. Hér voru framin pólitísk myrkvaverk og hér er víða óhreint mjöl í pokahorninu. Ég ætla hins vegar að hlíta þessari niðurstöðu. Ég er ekki vanur að fara í fýlu og ég vil taka það skýrt fram að ég ætla ekki að hlaupa í sérframboð,” sagði Hreinn Sveinsson, „Við höfum verk að vinna.“
VII
Um síðastliðin helgi hélt Framfaraflokkurinn blaðamannafund og kynnti stefnuskrá flokksins fyrir næstu Alþingiskosningar. Í máli Mjallar Snæsdóttur formann flokksins kom fram að meðal helstu baráttumála væru jöfnun lífskjara og áframhaldandi stöðugleika í efnahagsmálum. Í samtali við blaðamann Héraðsfréttatíðinda sagði Mjöll að ef Framfaraflokkurinn kæmist til áhrifa myndi hann með einu pennastriki skapa um 4.000 störf. „Það er alveg ljóst að við verðum að kveða niður atvinnuleysisdrauginn. Ennfremur munum við leggja fram umsókn um aðild að ESB. Því þegar allt kemur til alls er Ísland í Evrópu, það veit hvert einasta skólabarn. Líttu bara á landakortið. Einnig viljum við hefja stórsókn á Asíumarkað. Þar er vaxandi eftirspurn eftir allskyns vistvænum vörum, og við Íslendingar stöndum framarlega á því sviði,” sagði Mjöll Snæsdóttir.
Á fundinum kom fram að undir núverandi ríkisstjórn væru menntamálin í algerum óleystri. Eitt af því sem Framfaraflokkurinn hyggst beita sér fyrir er að seta menntamálin í öndvegi. „Upphleðsla mannauðs, þ.e.a.s. fjárfesting í góðri almennri menntun þjóðarinnar, gott andlegt heilbrigði og blómlegt menningarlíf eru þau atriði sem helst eru talin hafa viðhaldið hagvextinum í Japan, Suður-Kóreu, Taívan og Taílandi. Við viljum að íslenskir námsmenn sem eru í námi erlendis geti fengið stórhækkun lána frá LÍN og að endurgreiðslubyrði lánanna yrði létt. Það gengur náttúrulega ekki að ungt námsfólk sem eru að koma heim úr dýru námi og þurfa svo að standa í því að greiða lánin til baka að fullu. Þess vegna viljum við Framfaraflokksmenn að gera Ísland að fýsilegra kosti handa þessu ungu fólki og fella endur¬greiðslurnar að verulegu leyti niður. Það er það minnsta sem þetta samfélag okkar getur gert,“ sagði Mjöll.
VIII
Diljá K. Gottskálksdóttir þingkona Framfaraflokksins í Austurlandskjördæmi vestra hafnaði í áttunda og jafnframt næst neðsta sæti í prófkjöri sem haldið var 7. þ.m. Alls fékk hún 31 atkvæði í fyrsta til áttunda sæti. „Jú, vissulega hef ég óneitanlega orðið fyrir vissum vonbrigðum. Því er ekki að neita“, sagði Diljá þegar blaðamaður Héraðsfréttatíðinda ræddi við hana þegar öll atkvæði höfðu verið talin upp úr kjörkössunum. „Hins vegar vil ég taka það skýrt fram að þetta er óneitanlega viss sigur fyrir mig. Af öllum þeim þingmönnum og þingkonum Framfaraflokksins sem ekki náðu kjöri, þá náði ég besta kosninguna, þ.e.a.s. hlutfallslega séð.“ Þegar Diljá var innt eftir því hvort hún hyggst þiggja áttunda sætið sagði hún, „Ég vil ekki gefa neinar yfirlýsingar að svo stöddu. Ég á eftir að ræða við mína nánustu og taka púlsinn af fólkinu í kjördæminu. Því er ekki að neita að ég hef átt leynilegar könnunarviðræður við ónafngreindan stjórnmálaflokk, þannig að allar dyr standa mér óneitanlega opnar.“
IX
Í nýlegri könnun sem Skafís h.f. gerði fyrir Héraðsfréttatíðindin núna nýverið um fylgi flokkanna kemur í ljós að um talsvert fylgishrun er að ræða hjá Framfaraflokknum. Samkvæmt könnuninni er fylgi flokksins innan við tvö prósent á landsvísu og í sumum kjördæmum er fylgið vart mælanlegt. Spurt var í könnuninni Ef gengið væri til kosninga á morgun, hvaða flokk myndir þú kjósa? Leitað var til 1.500 manns á öllu landinu.
„Sko, ég hlusta ekki á svona tölur góði og ég blæs bara á þær,“ sagði Mjöll Snæsdóttir formaður Framfaraflokksins í samtali við blaðamann Héraðsfréttatíðinda. „Þessar tölur eiga eftir að snúast snarlega við. Það er alveg ljóst. Sjáðu, ég hef gert talsvert af því að þeysast um landið, heimsækja vinnustaði og tekið púlsinn á þjóðinni. Og það er alveg ljóst að Framfaraflokkurinn er í mikilli sókn. Mitt pólitíska nef segir mér það og ég læt ekkert skoðanakannafyrirtæki suður í Reykjavík segja mér neitt annað. Það er skoðanakönnunin á kosningadaginn sem skiptir máli. Við geysisterkan málefnapakka fyrir þessar kosningar. Líttu bara á stefnu okkar varðandi Lánasjóð íslenskra námsmanna. Við höfum byr undir báða vængi.“
Héraðsfréttatíðindin leitaði álits Svans Harðarsonar lektors í stjórnmálafræði við Háskóla Íslands. Hann taldi að Framfaraflokkurinn ætti við vanda að etja. „Það er augljóst að ef við skoðum þessar tölur frá því í júní í fyrra til dagsins í dag kemur glögglega í ljós að um gífurlegt hrun á fylgi flokksins er að ræða.“ Þegar hann var spurður að því hvort stefna flokksins gæti skýrt þetta fylgishrun sagði hann, „Það þyrfti að skoða betur.“